"კრიტიკული მეგობარი"

ურთიერთანამშრომლობის ერთ-ერთი ყველაზე უფრო ეფექტური სტრატეგია ე. წ. “კრიტიკული მეგობრების” ინსტიტუტი, რომელიც ითვალისწინებს სასწავლო პროცესში მასწავლებელთა ურთიერთდაკვირვებას. ეს მიდგომა ერთ-ერთი ეფექტიანი და ხემისაწვდომი ფორმაა სკოლის ბაზაზე პედაგოგიური პრაქტიკის გაუმჯობესებისათვის.
  განათლების სპეციალისტები ურთიერთდაკვირვების რამდენიმე ფორმას გამოყოფენ, თუმცა ყველა მათგანისათვის უცვლელია შემდეგი ეტაპები:

•  დაკვირვების წინა შეხვედრა - მასწავლებელი, რომლის გაკვეთილზეც ხდება დასწრება, აცნობს კოლეგას გაკვეთილის გეგმას; უხსნის, რა სახის დახმარებას ელის მისგან, რის შემდეგაც კოლეგები ერთობლივად შეიმუშავებენ გაკვეთილის შეფასების კრიტერიუმებს; 
•  გაკვეთილზე დასწრება - დაკვირვება გაკვეთილის მიმდინარეობის პროცესზე ან ცალკეულ დეტალებზე და შედეგების დეტალური აღნუსხვა;
• გაკვეთილის შემდგომი შეხვედრა - დაკვირვების შედეგების ერთობლივი ანალიზი, შეფასება და გაკვეთილის გეგმაში კორექტირების შეტანა.

  აღნიშნული მეთოდი პედაგოგს ეხმარება იმაში, რომ გარედან შეხედოს თავის სამუშაო პროცესს და გააანალიზოს პრობლემები. მეორე მხრივ, დამსწრე პედაგოგის მიზანიც პროფესიული ზრდა უნდა იყოს და არა კოლეგის კრიტიკა. კონკრეტულ გაკვეთილზე მან პედაგოგის ძლიერი მხარეებიც უნდა აღმოაჩინოს, რაც შემდეგ, შესაძლოა, თავადაც გამოიყენოს საკუთარ პედაგოგიურ პრაქტიკაში.